Takim UniBa & Njësia Kombëtare e Ozonit.
Tiranë, 19. Nëntor, 2025
“Femrat dhe Aksioni për Klimën: Protokolli i Montrealit dhe roli i RRR për një të ardhme të qëndrueshme.”
Në ambientet e UNIBA, Fakulteti i Shkencave Sociale, Turizmit dhe Sportit – Departamenti i Edukimit Fizik dhe Sporteve, drejtuar nga Zv. Rektori për Çështjet e Studentit dhe Komunitetit dhe Dekan, Prof. Dr. Artan Shyti, Shoqata “Barleti”, përfaqësuar nga Kryetari z. Ilia Kuro, dhe në bashkëpunim me Njësinë Kombëtare të Ozonit, e drejtuar nga znj. Mimoza Vokshi, u zhvillua sot një aktivitet informues dhe ndërgjegjësues me tematikë:
“Vajzat dhe Aksioni për Klimën: Protokolli i Montrealit dhe roli i RRR për një të ardhme të qëndrueshme.”
Të pranishëm ishin studentët e programit të edukimit fizik, të cilët pritet të jenë mësuesit e ardhshëm dhe kontribues të drejtpërdrejtë në edukimin e brezave për çështjet mjedisore. Gjatë takimit u referuan tema të rëndësishme, ndër të cilat:
- Femrat në luftën për mbrojtjen e Shtresës së Ozonit
- “Integrimi i perspektivës gjinore në Protokollin e Montrealit.”
Pjesëmarrësve iu prezantuan materiale vizuale dhe video edukative të fokusuara në rolin e femrave dhe të çdo individi në komunitet për mbrojtjen e mjedisit. Interaktiviteti i studentëve, diskutimet dhe pyetjet e ngritura krijuan një hapësirë të vlefshme reflektimi dhe shkëmbimi idesh për nisma të ardhshme.
Një moment thelbësor i aktivitetit ishte theksimi i rolit të grave në ndërgjegjësimin dhe edukimin mjedisor, i cili u përmbledh në këtë citim:
“Roli i grave në ndërgjegjësimin mjedisor përbën një faktor kyç në forcimin e përgjegjësisë komunitare dhe në promovimin e politikave të qëndrueshme.”
Në mbyllje, u nënvizua se nismat e tilla edukative janë investim afatgjatë për një shoqëri të shëndetshme dhe të qëndrueshme, duke përcaktuar drejtimin e duhur për brezat që vijnë.
